Mediat angleze kanë bërë të ditur se Liverpool është në kontakte të vazhdueshme për transferimin e mundshëm të mbrojtësit të djathtë të Bayer Leverkusen, Jeremie Frimpong. Përfaqësuesi i kombëtares hollandeze shkëlqeu sezonin e kaluar në Bundesliga, duke arritur shifra të dyfishta për gola dhe asistime, për të ndihmuar ekipin e tij drejt titullit kampion pa humbur asnjë ndeshje.
Burimet pranë lojtarit kanë bërë me dije se Liverpool e ka bërë atë objektivin e tyre kryesor për të zëvendësuar Trent Alexander-Arnold nëse ai vendos të largohet verën e ardhshme. Liverpool dëshiron të përpiqet deri në fund për të shtyrë Trent që të rinovojë, por kontaktet me Jeremie janë të vazhdueshme. Nuk përjashtohet mundësia që Liverpool të rrisë presionin së shpejti nëse Alexander-Arnold nuk tregon fleksibilitet për kushtet e rinovimit të kontratës së re.
Alexander-Arnold është në vitin e fundit të kontratës së tij me Liverpool dhe “The Reds” nuk kanë arritur ende një marrëveshje për të mbajtur anglezin në Anfield, i cili mbetet prioriteti i tyre. Kjo teorikisht mund të lejojë klubet e tjera të interesuara të ecin përpara Liverpool, në garën për Frimpong, i cili gjithashtu ka marrë vëmendjen e Manchester City dhe Real Madrid.
Frimpong mund të jetë një zëvendësues ideal afatgjatë për Kyle Walker tek Man City. Në të njejtën kohë, nëse Real Madrid përfundon duke i dhënë përparësi Frimpong në merkato, atëherë kjo mund të përfundojë në mënyrë pozitive për Liverpool, duke ndihmuar ata për të mbajtur Alexander-Arnold në ekip.
Deri më tani, anglezi ka pasur linkime konkrete me Real Madrid, por jo me një klub tjetër, gjë që ndoshta sugjeron se Alexander-Arnold ka vetëm një destinacion në mendje nëse do të largohet nga Anfield. Nëse Real vendos se do të preferonte Frimpong, atëherë Trent do të ishte i lumtur të refuzonte çdo interes tjetër dhe të angazhohej për të qëndruar tek Liverpool.
