Drejtuesit e Liverpool kanë bërë gati një listë me emrat potencialë për të zëvëndësuar Virgil Van Dijk kur ky i fundit të largohet nga Anfield. Hollandezi është në vitin e fundit të kontratës së tij dhe pavarësisht zërave për një rinovim të mundshëm, duket se bordi drejtues i Liverpool po përgatitet për largimin e mbrojtësit shtatëlartë.
Por cili është kandidati kryesor për të zëvëndësuar Van Dijk? Sipas prestigjozes CaughtOffside, Liverpool ka veçuar asin e Sevilla, Loic Balde, mes emrave të tjerë në listën e shkurtër. Agjentët e “The Reds” janë duke monitoruar tashmë rregullisht 24 vjeçarin për të ndjekur progresin e tij. Francezi është gjithashtu në radarin e gjermanëve të Bayern Munich.
Kontrata e Balde me Sevilla është aktive deri në vitin 2029, dhe klauzola për prishjen e saj do të kërkojë rreth 42 milionë paundë. Megjithatë, kjo shumë do të rritet në rastin e një lufte financiare mes disa klubeve, për të siguruar kartonin e francezit. Në sezonin e tij të parë tek Sevilla, lojtari ka impresionuar me paraqitjet e tij në mbrojtje, por dhe me kontributet në fazën ofensive. Francezët e PSG gjithashtu thuhet se janë të interesuar për Loic Balde, por ende nuk ka një përpjekje konkrete për të sjellë lojtarin në Paris.
Liverpool ndërkohë duhet të mendojë dhe për kontratat e Mo Salah and Trent Alexander-Arnold. Të dy lojtarët janë në vitin e fundit të kontratës, dhe drejtuesit e Liverpool pritet të startojnë negociatat për rinovim. Salah është përfolur prej kohësh për një largim drejt Arabisë Saudite, ndërkohë që vet lojtari ka lënë të kuptohet se ky do të jetë sezoni i fundit tek Liverpool. Ndërkohë përsa i përket Trent Alexander-Arnold, e ardhmja e anglezit është ende e paqartë. Lojtari është linkuar me një transferim tek Real Madrid, por për momentin nuk ka asnjë komunikim konkret mes palëve.
