Sulmuesi i Bournemouth, Antoine Semenyo ka tërhequr së fundmi vëmendjen e shumë klubeve rivale në Premier League, mes tyre dhe Liverpool, Newcastle dhe Tottenham Hotspur. Semenyo ka startuar mjaft mirë sezonin e ri në Premier League, dhe ka shënuar 12 gola në 50 paraqitje gjithsej me klubin e tij. Kujtojmë se sulmuesi iu bashkua Bournemouth në merkaton e janarit të vitit të kaluar nga Bristol City në Championship. Edhe asokohe, konkurrenca për firmën e lojtarit ishte e lartë, teksa West Ham, Southampton dhe Crystal Palace ishin gjithashtu në ndjekje të tij.
Drejtuesit e klubit nuk duan që të humbasin sulmuesin, siç ndodhi me Dominic Solanke në verë, i cili iu bashkua Tottenham Hotspur. Bournemouth përfitoi plot 55 milionë paundë nga shitja e Solanke, por humbi një lojtar mjaft të rëndësishëm, dhe klubi nuk do të humbasë një tjetër aset të vlefshëm si Semenyo, të paktën deri tani.
Sulmuesi është vetëm 24 vjeç dhe mosha e tij e re e bën atë një alternativë mjaft tërheqëse për shumë klube, jo vetëm në Premier League. Lojtari e nisi karrierën e tij profesioniste në moshën 17 vjeçare me Bristol City. Në sezonin e tij të fundit në Championship, Antoine Semenyo shënoi 14 gola, përpara se të transferohej tek Bournemouth. Lojtari ka ende 5 vite në kontratën e tij aktive me klubin dhe kjo e vendos Bournemouth në një pozitë mjaft të mirë negociuese.
Nëse Antoine largohet, klubi do të mbështetet tek lojtarë të tjerë në repartin e sulmit, duke përfshirë Ryan Christie, Marcus Tavernier dhe Luis Sinisterra. Për momentin, ende nuk dihet nëse Semenyo ka dëshirë të startojë një kapitull të ri në karrierën e tij. Gjithsesi, sulmuesi do të vihet përballë ofertave mjaft tunduese, duke përfshirë këtu mundësinë për të luajtur në UEFA Champions League.
