Manchester United dhe Tottenham janë duke monitoruar asin e Wolves, Matheus Cunha. Ky i fundit ka rënë në sy këtë sezon, pas një starti mjaft të mirë me Wolves, duke shënuar 7 gola në 12 ndeshje në Premier League. Lojtari gjithashtu ka dhënë 3 asiste gjatë këtyre sfidave. Përveç United dhe Tottenham, italianët e Napoli gjithashtu kanë dërguar përfaqësuesit e tyre në Angli, për të ndjekur nga afër brazilianin.
Sulmuesi është lojtari më i shtrenjtë në historinë e Wolves. Braziliani u bë pjesë e klubit anglez në vitin 2022, për shifrën e 43 milionë paundëve nga Atletico Madrid. Në të njejtën kohë, përveç Matheus Cunha, klubet rivale në Premier League po monitorojnë një tjetër lojtar të Wolves. Kësaj rradhe bëhet fjalë për Ait-Nouri, i cili është nën shënjestrën e Liverpool, Chelsea dhe Tottenham prej më shumë se 1 viti.
Burime të brendshme pranë Wolves bëjnë me dije se drejtuesit e klubit insistojnë se nuk do të humbasin asnjë prej lojtarëve të tyre të rëndësishëm në merkaton e janarit. Klubi kërkon që trajneri Gary O’Neil të ketë në dispozicion ekipin më të mirë të mundshëm, për të shmangur rrezikun e rënies nga kategoria në fund të sezonit. Ky është një risk real për Wolves, duke marrë parasysh nivelin e lartë kompetitiv të Premier League.
Në të njejtën kohë, klubi do të kërkojë të afrojë disa përforcime gjatë merkatos së janarit. Wolves po kërkon të sjellë një qendër mbrojtës në ekip, pas largimit të Max Kilman drejt West Ham në merkaton e verës. Yerson Mosquera ndërkohë pësoi një dëmtim që do ta lërë jashtë fushës së blertë për pjesën e mbetur të sezonit, dhe klubi ka padyshim nevojë për përforcime në repartin difensiv. Një ndër emrat që mund t’i bashkohet Wolves merkaton e ardhshme është anglezi Eric Dier.
