Manchester United kërkon shërbimet e talentit të Flamengo, Gabriel Barbosa, dhe “Djajtë e Kuq” janë të gatshëm të ofrojnë kartonin e Antony në shkëmbim. Lajmi është publikuar nga mediat lokale angleze, dhe duket se drejtuesit e klubit po mendojnë seriozisht këtë skenar për merkaton e janarit.
“Djajtë e Kuq” po vuajnë për të shënuar gola këtë sezon, teksa Marcus Rashford, Alejandro Garnacho dhe Anthony Martial kanë shënuar vetëm 1 gol secili. Holjlund ndërkohë ende nuk ka shënuar në Premier League. Antony gjithashtu ende nuk ka shënuar, dhe është aktivizuar vetëm 11 herë këtë sezon, për shkak dhe të akuzave për dhunë në familje, situatë që vendosi në vështirësi serioze karrierën e tij në Old Trafford. Sulmuesi nuk ka shënuar për ekipin e tij që prej muajit prill, ku realizoi golin e fitores ndaj Nottingham Forest.
Barbosa ndërkohë ka shënuar 18 gola për Flamengo këtë sezon, në të gjitha kompeticionet. Sulmuesi konsiderohet një nga lojtarët më të mirë të kampionatit brazilian dhe kontrata e tij skadon vitin e ardhshëm. Kjo do të thotë se United mund të përfitojë kartonin e tij për rreth 20 milionë euro. Në shkëmbim, Flamengo gjithashtu mendohet se dëshiron të huazojë Antony për të paktën gjysmën e mbetur të sezonit pas merkatos së janarit. Duke qënë se Antony ka një kontratë aktive deri në vitin 2027 me United, një largim përfundimtar ka pak gjasa të ndodhë.
Ndërkohë, United ka menduar dhe për disa emra të tjerë për sulmin. Ivan Toney dhe Victor Osimhen i Napoli janë të dy në radarin e “Djajëve të Kuq”, por kartoni i sulmuesëve do t’i kushtonte United shumë më shumë sesa ai i Barbosa. West Ham u përpoq të firmoste me brazilianin janarin e kaluar, por marrëveshja nuk u mbyll dot në kohë. Mbetet të shohim nëse United do t’ia dalë të sjellë Barbosa në Old Trafford.
