Sipas mediave angleze, trajneri i Manchester United, Erik ten Hag, është përfshirë personalisht në ndjekjen e talentit të Bologna, Joshua Zirkzee. Sulmuesi i talentuar hollandez performoi mjaft mirë në sezonin që lamë pas, duke tërhequr vëmendjen e shumë klubeve europiane. Një prej tyre është dhe Manchester United, që ka vendosur lojtarin në listën prioritare të merkatos këtë verë.
Kujtojmë se “Djajtë e Kuq” e mbyllën Premier League në vendin e 8 sezonin që lamë pas, dhe përveç problemeve në mbrojtje, mungesa e golave ishte gjithashtu një çështje mjaft shqetësuese për Ten Hag. Marcus Rashford dështoi të përmbushte pritshmëritë e kërkuara prej tij dhe kjo e bën Zirkzee një alternativë akoma më të nevojshme në sulm. Bologna kërkon rreth 34 milionë paundë për kartonin e lojtarit, dhe drejtuesit e United janë të gatshëm ta paguajnë këtë shifër. Për momentin po zhvillohen bisedime konkrete mes United dhe drejtuesëve të Bologna. Megjithatë, palët kanë ende mosmarrëveshje në lidhje me pagën e lojtarit dhe kohëzgjatjen e kontratës.
Vendimi i United për të mbajtur Ten Hag në postin e tij erdhi si disi tronditës, me Ratcliffe që mendohet se ka qenë i prirur drejt shkarkimit të tij. Por shefat e United më pas fluturuan për në Spanjë për të ndërprerë pushimet e Ten Hag dhe për ta informuar atë se ai do të mbetej në krye të “Djajëve të Kuq”. në një intervistë të fundit, Ratcliffe ka justifikuar këtë vendim duke thënë se përgjegjësia e dështimeve të United në sezonet e fundit nuk mund të jetë vetëm e trajnerit:
“Nëse shikoni 11 sezonet e fundit në Manchester United, ne kemi pasur një seri të tërë trajnerësh, dhe disa prej tyre janë shumë të mirë, ndoshta kemi pasur shtatë trajnerë dhe asnjëri prej tyre nuk ka pasur sukses fare. Nuk e kanë fajin vetëm trajnerët. Është mjedisi në të cilin po punojnë…”
