Drejtuesit e Manchester United janë duke eksploruar mundësinë e transferimit të Leon Goretzka në Old Trafford. Mesfushori thuhet se është i pakënaqur me situatën e tij aktuale te Bayern Munich. Goretzka është pjesë e gjigandëve bavarezë prej vitit 2018, dhe është aktivizuar plot 230 herë me klubin gjerman, duke fituar dhe shumë tituj gjatë kësaj periudhe. Mesfushori ka startuar si titullar në pjesën më të madhe të këtyre sfidave, por tashmë duket se Goretzka e ka humbur rolin e titullarit nën drejtimin e trajnerit Vincent Kompany.
Këtë sezon, lojtari ka luajtur në 9 nga 16 takimet e Bayern Munich, por vetëm në 1 prej këtyre sfidave, Goretzka ka luajtur për më shumë se 30 minuta. E ardhmja duket akoma më e vështirë duke marrë parasysh faktin që me rikthimin e Joao Palhinha nga dëmtimi, mesfushori do të ketë akoma më pak hapësira për të qënë titullar në ekipin e Vincent Kompany.
Kjo situatë po ndiqet me vëmendje nga Manchester United që po planifikon të bëjë një ofertë për lojtarin në merkaton e verës. Kontrata e Goretzka skadon në vitin 2026, dhe Bayern thuhet se është i prirur të heqë dorë prej lojtarit, në rastin e ofertës së duhur financiare. Ndërkohë, United do të duhet të konkurrojë me Union Berlin për kartonin e lojtarit, pasi klubi gjerman gjithashtu është i interesuar për Leon. Drejtori sportiv i Union Berlin është shprehur:
“Të gjithë e dinë se situata e tij nuk është e lehtë. Ai do të mendojë për të ardhmen e tij, është normale. Të gjitha klubet mund të imagjinojnë Leon Goretzka në ekipin e tyre. Edhe ne mund ta imagjinojmë atë me ne.”
Gjithsesi, United mbetet ekipi favorit për të siguruar shërbimet e Leon Goretzka në verë, pasi anglezët kanë shumë më shumë mundësi financiare sesa Union Berlin.
