Manchester United ka vendosur se Jarrad Branthwaite i Everton do të jetë objektivi kryesor i “Djajëve të Kuq”, përsa i përket mbrojtjes në merkaton e verës. Branthwaite gjithashtu është linkuar me një lëvizje drejt Tottenham, teksa klubi londinez gjithashtu është i interesuar në shërbimet e lojtarit. Kjo situatë mund të krijojë një garë financiare mes United dhe spursave.
Branthwaite luajti me PSV Eindhoven sezonin e kaluar si i huazuar, dhe trajneri i ekipit hollandez, Ruud van Nistelrooy, foli me superlativa për mbrojtësin. Mediat angleze kanë zbuluar ndërkohë se agjentët e United kanë pasur që në atë kohë nën vëzhgim lojtarin. Pavarësisht se “Djajtë e Kuq” janë në procesin e kalimit të aksioneve tek kompania e Jim Ratcliffe, burimet pranë klubit bëjnë me dije se kjo situatë nuk do të ndikojë tek transferimi i mundshëm i Jarrad Branthwaite në Old Trafford.
Megjithatë, operacioni mbetet për t’u zhvilluar në merkaton e verës. Duke u nisur nga zhvillimet e fundit, trajneri Ten Hag do ta ketë të vështirë blerjen e emrave të mëdhenj në merkaton e dimrit, dhe Branthwaite hyn gjithashtu tek lojtarët që shihen si pjesë e vizionit të United për sezonin e ardhshëm.
Objektivi kryesor i anglezëve në merkaton e janarit është largimi i Donny van de Beek dhe Jadon Sancho. Të dy lojtarët duket se nuk kanë më asnjë shans për të luajtur me ekipin e parë, dhe drejtuesit e United kërkojnë të përfitojnë të ardhura, për të financuar dhe afrimet e mundshme.
Ndërkohë përtej Sancho dhe Van de Beek, shumë yje të tjerë mund të largohen nga Old Trafford në fund të sezonit. Më së shumti bëhet fjalë për repartin e mbrojtjes, ku Varane, Maguire, Lindelof dhe Jonny Evans janë të gjithë në listën e lojtarëve që mund t’i japin fund karrierës në Old Trafford.
