Trajneri i ri i Manchester United, Ruben Amorim, kërkon të sjellë në Old Trafford, një nga mbrojtësit më të kërkuar në Europë për momentin. Tashmë që Amorim pritet të marrë drejtimin e United në nëntor, tekniku portugez duket se ka dëshirë të marrë me vete një nga lojtarët e tij më të mirë tek Sporting Lisbon. Bëhet fjalë për Ousmane Diomande.
Sipas burimeve pranë klubit, Amorim kërkon të adaptojë tek United, të njejtin sistem me 3 mbrojtës që ka aplikuar tek Sporting gjatë sezoneve të fundit. Formacioni ka rezultuar mjaft i suksesshëm në Portugali, dhe tekniku beson se mund të ketë sukses dhe në Premier League. Sidomos duke marrë parasysh faktin që “Djajtë e Kuq” kanë kualitetin e duhur në qendër të mbrojtjes, pasi të rikthehet dhe Leny Yoro nga dëmtimi.
Për momentin, në rast se Amorim vendos të luajë me 3 lojtarë në mbrojtje opsionet e tij janë Yoro, De Light dhe Martinez. Duke qënë se Harry Maguire dhe Victor Lindelof janë përfolur prej kohësh për një largim të mundshëm nga Old Trafford, Amorim kërkon të sjellë Diomande për të patur më shumë opsione në prapavijë.
Por sa e lehtë do të jetë që United të bindë Sporting për të hequr dorë nga mbrojtësi? Lojtari ka një klauzolë për prishjen e kontratës në vlerën e 70 milionë paundëve. Shifra është e përballueshme nga ana e klubit, por lojtari ka qënë dhe në monitorimin e ekipeve të tjera si Arsenal, Liverpool dhe Bayern Munich. Kjo mund të ngjallë një luftë financiare mes skuadrave të interesuara për kartonin e Diomande.
Mbrojtësi iu bashkua Sporting në vitin 2022 për vetëm 6.1 milionë paundë nga danezët e Midtjylland. Amorim ndërkohë ka lidhur një kontratë me Manchester United deri në vitin 2027, me opsionin për të rinovuar dhe 1 vit shtesë.
