Ruud van Nistelrooy është favoriti numër 1 për të siguruar postin e trajnerit të Leicester City, sipas mediave angleze. Drejtuesit e klubit shkarkuan trajnerin Steve Cooper para disa ditëve për shkak të rezultateve të dobëta, dhe mosmarrëveshjeve me lojtarët. Tashmë, duket se Ruud van Nistelrooy do të zëvëndësojë Cooper në krye të pankinës së King Stadium. Graham Potter dhe David Moyes ishin dy emrat e tjerë të përmendur në lidhje me rolin e trajnerit tek Leicester, por Van Nistelrooy kryeson për momentin garën.
Ish-lojtari hollandez ishte pjesë e stafit teknik të Erik ten Hag tek Manchester United. Ai mori drejtimin e klubit në mënyrë të përkohshme pas shkarkimit të Ten Hag, deri në emërimin e Ruben Amorim, si trajner i ri i “Djajëve të Kuq.” Ndërkohë, interes për Ruud van Nistelrooy ka shprehur dhe Hamburger SV në kategorinë e dytë gjermane. Van Nistelrooy ka luajtur për Hamburger SV si lojtar për 1 sezon, por pavarësisht lidhjes së mëparshme me klubin, hollandezi është më i prirur për të pranuar ofertën e Leicester City. Kjo pasi Nistelrooy do të ketë mundësinë të menaxhojë një ekip në ligën me nivelin më të lartë të futbollit europian.
Tekniku hollandez ishte në krye të United për 4 ndeshje, duke fituar 3 prej tyre dhe barazuar 1. Përveç kësaj eksperience, Van Nistelrooy gjithashtu ka menaxhuar PSV Eindhoven në Hollandë, duke siguruar 34 fitore në 50 takime. Tekniku ia doli të fitojë dhe kupën e Hollandës.
Van Nistelrooy dëshironte që të vazhdonte të ishte pjesë e Manchester United, por trajneri i ri i klubit, Ruben Amorim, vendosi të lërë të lirë hollandezin për t’u larguar, pasi preferon të punojë me stafin e tij në krye të United. Gjithsesi, duket se tekniku mund të rikthehet përsëri në Premier League shumë shpejt.
