Paris Saint-Germain do të hidhet në sulm për kartonin e asit të Newcastle, Bruno Guimaraes. Kampionët në fuqi të Francës kërkojnë të gjenë zëvëndësuesin perfekt për Manuel Ugarte, i cili pritet të largohet. Uruguaiani u bë pjesë e parizienëve për shifrën e 60 milionë eurove nga Sporting Lisbon, sezonin që lamë pas. Megjithatë, lojtari ka dështuar të ketë impaktin e pritur prej tij në Paris. Kjo është dhe arsyeja se përse drejtuesit e PSG kanë kthyer vëmendjen e tyre nga Bruno Guimaraes.
Megjithatë, ky transferim nuk do të jetë aspak i lehtë. Bruno Guimaraes ka qënë në qendër të vëmendjes gjatë javëve të fundit, teksa Manchester City dhe Arsenal gjithashtu janë të interesuar për firmën e brazilianit. Bruno ka një kontratë aktive me Newcastle deri në vitin 2028, dhe kontrata përfshin një klauzolë për prishjen e saj, me vlerë 100 milionë paundë, ose 125 milionë euro.
Kjo do të thotë se sipas të gjitha gjasave, për kartonin e lojtarit në merkaton e verës pritet të ketë një betejë financiare mes klubeve rivale të Premier League dhe Paris Saint-Germain. Drejtori sportiv i klubit francez, Luis Campos, është gati për të bërë ndryshime të mëdha në Parc de Princes, dhe afrimi i lojtarëve të kompletuar dhe premtues është një prej pikave kyçe të projektit.
Gjithsesi, PSG ka gati dhe një plan B në rast se dështon në ndjekjen e Bruno Guimaraes. Alternativa tjetër për mesfushën është ylli i Bayern Munich, Joshua Kimmich. Mesfushori gjerman është një lojtar që vlerësohet shumë nga trajneri Luis Enrique, dhe mes të tjerave, kartoni i tij kushton më pak se ai i Bruno. Gjithsesi, qëndrimi i klubit gjerman në lidhje me Kimmich është ende i paqartë, teksa shumë gjëra pritet të ndryshojnë me ardhjen e Vincent Kompany në krye të pankinës.
