Real Madrid kryeson listën e klubeve gjigande europiane që janë duke monitoruar yllin e kombëtares angleze, Marc Guehi. Barcelona dhe Juventus gjithashtu janë duke ndjekur qendër-mbrojtësin e Crystal Palace. Guehi pritet të largohet nga Palace në merkaton e verës, por drejtuesit e klubit pretendojnë të arkëtojnë rreth 50 milionë paundë nga kartoni i tij, dhe duket se ka disa klube europiane që janë të gatshme ta paguajnë këtë shifër.
Guehi është produkt i akademisë së Chelsea, dhe mbrojtësi ka vetëm 2 vite kontratë të mbetur me Crystal Palace. Drejtuesit e Palace preferojnë të shesin Guehi që të mos rrezikojnë të humbasin lojtarin me kosto zero. Real Madrid është duke kërkuar një qendër-mbrojtës, pas largimit të Nacho drejt Al Qadsiah.
Klubet e Premier League ndërkohë gjithashtu janë vënë në ndjekje të Guehi. Arsenal dhe Tottenham janë admirues të lojtarit prej kohësh, ndërkohë që Manchester United gjithashtu është duke ndjekur progresin e lojtarit. Megjithatë, “Djajtë e Kuq” janë më shumë të përqëndruar në finalizimin e transferimit të Matthijs De Ligt nga Bayern Munich. Nëse kjo lëvizje realizohet, sipas të gjitha gjasave drejtuesit e United to të heqin dorë nga ndjekja e Guehi.
Pavarësisht paraqitjeve mjaft të kritikuara të kombëtares angleze në Euro 2024, Guehi mund të cilësohet si lojtari që është paraqitur më mirë tek “3 luanët”. Anglezi ishte ekselent në 2 sfidat e para ndaj Serbisë dhe Danimarkës, duke vënë në pah aftësitë e tij mbrojtëse dhe pasimet e sakta. Guehi ishte dhe asistuesi në golin e rëndësishëm të Jude Bellingham ndaj Sllovakisë.
Megjithatë, mbrojtësi nuk do të aktivizohet në ndeshjen e rëndësishme që Anglia do të luajë përballë Zvicrës, për shkak të ndëshkimit me kartonin e dytë të verdhë në këtë kompeticion, në sfidën ndaj Sllovakisë. Mbetet të shohim se si do të performojnë “3 luanët” pa ndihmën e Guehi në prapavijë.
