Gazetari Fabrizio Romano ka konfirmuar se drejtuesit e Real Madrid janë duke monitoruar yllin e Liverpool, Trent Alexander-Arnold. E ardhmja e lojtarit tek Liverpool është ende e paqartë, teksa klubi pritet të përfshihet nga një sërë largimesh, tashmë që trajneri Jurgen Klopp do të largohet në fund të sezonit.
Tekniku gjerman do të zëvëndësohet nga trajneri aktual i Feyenoord, Arne Slot. Ndërkohë, pas lajmit për largimin e Klopp, Alexander-Arnold, Mohamed Salah dhe Virgil van Dijk gjithashtu janë përfolur se mund të lënë klubin në verë. Të gjithë lojtarët e sipërpërmendur kanë një kontratë aktive me “The Reds” deri në vitin 2025. Kjo do të thotë se Real Madrid mund të përfitojë kartonin e Trent Alexander-Arnold për një vlerë monetare relativisht të ulët. Liverpool nuk mund të rrezikojë të humbasë me kosto zero anglezin, dhe kjo do të favorizojë Real Madrid gjatë negociatave.
Fabrizio Romano u shpreh për situatën e Arnold, dhe tratativat e Real Madrid:
“Trent Alexander-Arnold është një nga objektivat e Real Madrid. Ata e pëlqejnë shumë atë lojtar. Real Madrid do të përpiqet të firmosë me Trent në verë, nëse ai nuk vendos të rinovojë kontratën me Liverpool.”
Alexander-Arnold konsiderohet një nga lojtarët më të mirë në pozicionin e tij, dhe sipas disa raportimeve në Spanjë, mbrojtësi është i prirur për t’u bashkuar tek Real, me shokun e tij të kombëtares angleze, Jude Bellingham. Për momentin mes Real Madrid dhe Liverpool nuk ka ende komunikime konkrete, pasi është ende herët.
Bordi drejtues i klubit spanjoll ka dhe disa vendime të tjera mjaft të rëndësishme për të marrë, mes tyre është e ardhmja e Luka Modric. Mesfushori legjendar i Real Madrid duket ende në formë mjaft të mirë dhe agjenti i tij pritet të takohet së shpejti me presidentin Florentino Perez. Klubi spanjoll ende nuk ka marrë një vendim për të ardhmen e kroatit.
