Sipas mediave spanjolle, Vinicius Junior ka vendosur të shtyjë për një moment të dytë, vendimin mbi rinovimin e kontratës me Real Madrid. Lajmi ka ardhur pas interesimeve nga klubet arabe, të cilat janë të gatshme t’i ofrojnë superstarit brazilian një nga kontratat sportive më fitimprurëse të të gjitha kohërave. Vinicius është linkuar gjithashtu dhe me klube gjigande në Europë, si Manchester United, Liverpool dhe Paris Saint-Germain.
Mediat sportive raportuan fillimisht se një klub nga Arabia Saudite i ka ofruar Real Madrid plot 300 milionë euro për kartonin e tij. Disa burime ndërkohë kanë aluduar se braziliani është detyruar t’i refuzojë këto oferta, por trajneri Carlo Ancelotti ka hedhur poshtë këto raportime. Gjithsesi interesi nga klubet arabe duket se do të vazhdojë për një kohë të gjatë, dhe kjo ka bërë që braziliani të rishikojë dhe një herë planet për të ardhmen.
Vinicius pritet të shtyjë rinovimin me Real, të paktën deri në fund të këtij sezoni. Përveç aspektit monetar, që duket se është një nga faktorët ndikues në vendimin e sulmuesit, Vini po mendon dhe për rolin e tij në klub, tashmë që Kylian Mbappe është pjesë e madrilenëve. Edhe përpara ardhjes së francezit në Bernabeu, shumë zëra ishin skeptikë për integrimin e tij tek Real, duke qënë se Vinicius aktivizohet në të njejtin pozicion si Mbappe.
2 ndeshjet e para të madrilenëve në La Liga kanë treguar këtë problem, teksa ekipi e ka pasur të vështirë të gjejë balancën në sulm, me disa lojtarë të së njejtit pozicion në fushën e blertë. Gjithsesi, duhet thënë se Vinicius është ende larg një transferimi në Arabinë Saudite. Lojtari është vetëm 24 vjeç dhe e di se mund të luajë në nivelin më të lartë të futbollit edhe për shumë vite të tjera. Kjo është arsyeja kryesore se përse një transferim drejt klubeve arabe mbetet i vështirë për t’u realizuar.
