Mediat angleze kanë raportuar se Raheem Sterling është tashmë nën shënjestrën e gjigandëve italianë të Juventus. Sulmuesi i Chelsea ndodhet në një moment delikat në karrierën e tij, pasi duket se do ta ketë të vështirë të gjejë hapësira këtë sezon, në Stamford Bridge. Sterling nuk ishte pjesë e lojtarëve të grumbulluar në ndeshjen ndaj Manchester City, dhe kjo vetëm sa ka përkeqësuar më tej klimën mes lojtarit dhe klubit.
Sulmuesi thuhet se me anë të përfaqësuesëve, i ka kërkuar drejtuesëve të Chelsea më shumë qartësi për të ardhmen e tij. Mes Sterling dhe Chelsea pritet të ketë një takim së shpejti, për të qartësuar situatën. Juventus nga ana tjetër do të vazhdojë të ndjekë nga afër situatën. Italianët duhet fillimisht të shesin lojtarë, nëse duan të sjellin Sterling në Torino. Ndër emrat e lakuar për t’u larguar, mes të tjerëve është dhe Federico Chiesa.
Edhe nëse Juventus heq dorë në një moment të caktuar nga ndjekja e Sterling, duket se Chelsea sipas të gjitha gjasave është gati të shesë anglezin, në momentin e parë që vjen një ofertë e cila përmbush kushtet. Në seancat stërvitore të javës së kaluar, trajneri Enzo Maresca gjithashtu thuhet se i ka komunikuar Sterling se opsionet e tij për t’u aktivizuar këtë vit do të jenë të limituara.
Gjithsesi, largimi i sulmuesit nuk do të jetë i lehtë. Sipas raportimeve, Sterling përfiton rreth 320 mijë paundë në javë tek Chelsea, një shifër mjaft e lartë nga e cila futbollisti nuk do të heqë dorë lehtë. Për më shumë, familja e lojtarit është e stabilizuar tashmë në Londër, dhe një transferim në Itali, apo dhe në vende të tjera larg kryeqytetit britanik do të ishte jo ideal.
Kjo është dhe arsyeja se përse Sterling nuk po konsideron një lëvizje drejt Arabisë Saudite, pavarësisht interesit nga klubet arabe.
