Mediat angleze kanë raportuar orët e fundit se Thomas Tuchel ka pranuar të marrë përsipër rolin e trajnerit të kombëtares angleze të futbollit. “3 luanët” kanë qënë nën drejtimin e trajnerit të përkohshëm, Lee Carsley, që pas dorëheqjes së Gareth Southgate në përfundim të europianit të kaluar. Kujtojmë se Anglia u mposht në finalen e kompeticionit nga Spanja, duke shënuar një tjetër disfatë në objektivin për të fituar një trofe madhor.
Tuchel është duke firmosur kontratën dhe prezantimi i tij zyrtar pritet të bëhet brenda kësaj jave në Wembley. Mediat angleze kanë raportuar se Pep Guardiola gjithashtu ishte në konsideratë nga federata angleze e futbollit, por duket se tekniku spanjoll nuk është ende i gatshëm të heqë dorë nga drejtimi i Manchester City.
Lee Carsley pritet të udhëheqë Anglinë dhe në 2 ndeshjet e ardhshme në muajin nëntor, përballë Greqisë dhe Republikës së Irlandës. Më pas, Tuchel do të marrë drejtimin e ekipit. Gjermani është mjaft i familjarizuar me futbollin anglez, duke qënë se ka qënë nën drejtimin e Chelsea në Premier League. Tuchel arriti të fitojë Champions League, UEFA Super Cup dhe Botërorin e Klubeve, përpara se të shkarkohej nga klubi londinez. Eksperiencat e tij me Bayern Munich, Borussia Dortmund dhe Paris Saint-Germain e bëjnë atë një kandidat ideal për të udhëhequr Anglinë drejt një trofeu madhor.
Në merkaton e verës që lamë pas, Tuchel u linkua me rolin e trajnerit të Manchester United, por asokohe mediat raportuan se gjermani refuzoi të merrte drejtimin e pankinës në Old Trafford. Ndonëse sezoni i tij i fundit tek Bayern Munich mund të konsiderohet një eksperiencë negative, tekniku gjerman mbetet një nga trajnerët më në zë në Europë. Tuchel ia doli të fitojë 2 herë titullin kampion në Ligue 1 me PSG, si dhe kupën e Gjermanisë me Dortmund.
